Həkimlərin maaşı yeni qaydalar ilə hesablanacaq

2019-03-09 | Kadr işi | 3848

2020-ci ildən bütün ölkə üzrə icbari tibbi sığortanın tətbiqinə başlanacaq. Bu məqsədlə 2019-cu ildə bütün xəstəxanalar publik hüquqi şəxsə çevriləcəklər. Fins.az-ın məlumatına görə, bunu İcbari Tibbi Sığorta üzrə Dövlət Agentliyinin sədri Zaur Əliyev bildirib. O qeyd edib ki, bu il bir neçə hazırlıq işlərinin həyata keçirilməsi nəzərdə tutulub:

“2020-ci ildən bütün ölkə üzrə icbari tibbi sığortanın tətbiqinə başlamalıyıq. Məsələnin iki tərəfi var, sığorta haqlarının yığılması və xərclənməsi, yəni xəstəxanalara ödənilməsi. Bu gün xəstəxanalar dövlət büdcəsindən maliyyələşirlər. İcbari tibbi sığorta tətbiq edildikdə xəstəxanalar dövlət büdcəsindən deyil, Agentlikdən maliyyələşəcəklər. Xəstəxana hansı tibbi xidmətləri göstərəcəksə həmin xidmətlərin qiymətləri olacaq. Biz də bu qiymətlər əsasında sığortalı vətəndaşın əvəzinə xəstəxanaya vəsait köçürəcəyik. İlk növbədə xəstəxanalar vəsaiti qəbul etməyi bacaqmalıdırlar. Bu hüquqi məsələdir. Xəstəxanalar publik hüquqi şəxsə çevrilməlidirlər. Hazırda xəstəxanalar kənardan vəsait qəbul edə bilmirlər. Biz planlaşdırıq ki, 2019-cu ildə xəstəxanaların publik hüquqi şəxsə çevrilməsi yekunlaşsın”.

HƏKİMLƏRİN MAAŞLARI YENİ QAYDALAR İLƏ HESABLANACAQ

Zaur Əliyev bildirib ki, bir çox normativ -hüquqi aktlara əlavə və dəyişikliklər nəzərdə tutulur. “Həmçinin tibb işçilərinin əməkhaqları yeni qaydalar ilə hesablanacaq. Tibbi işçisinin xəstəxanada işlədiyinə görə müəyyən bir məvacibi ilə bərabər, göstərdiyi fəaliyyətə görə də qazancı olacaqdır. Yəni, həkimin yanına daha çox xəstə gəlirsə, ağır əməliyyatlar aparırsa, o həkimin əlavə qazancı olacaqdır. Bu məqsədlə də qanunda dəyişiklik olmalıdır”.

XƏSTƏXANLARDA YENİ PROQRAM TƏMİNATI TƏTBİQ EDİLƏCƏK

Zaur Əliyev əlavə edib ki, ən vacib hazırlıq işlərindən biri avtomatlaşdırama ilə bağlıdır: “Xəstəxanaların bizə təqdim edəcəkləri reyestr üzrə ödənişlərin kağız ilə aparılması fiziki olaraq mümkünsüzdür. Bütün xəstəxanlarda idarəçiliyin avtomatlaşdırılması proqram təminatını tətbiq etməliyik. Artıq hazırlıq işlərinə başlamışıq. Xəstəxanlarda bütün proseslər elekton aparılacaqdır. Xəstənin qeydiyyatı, müalicəsi, bu xidmətlərə görə agentlikdən vəsaitin alınması və s. əməliyyatlar elektronlaşdırılacaq. Həkim xəstənin sağlamlıq tarixçisinə baxa biləcəkdir”.

Agentliyin sədri bildirib ki, pilot rayonlarda yeni əməkhaqqı qaydalarının tətbiqi il öncə həkimləri narahat edib, lakin sonradan onlar bu sistemi qəbul etməyə başlayıblar. Zaur Əliyev əlavə edib ki, xəstəxanalarda əlavə funksiyalara da ehtiyac olacaqdır.

Zaur Əliyevin geniş müsahibəsinə buradan baxa bilərsiniz.

© Marja

Mənbə: http://fins.az/sigorta/976633/icbari-tibbi-sigorta-ile-bagli-muhum-xeber.html