Məcburi dövlət sosial sığorta haqqının dərəcələri azaldılır.

2020-05-02 | Vergilər | 6604

AR Milli Məclisinin 01.05.2020 tarixində keçirilmiş iclasında "Sosial sığorta haqqında" qanuna dəyişikliklər qəbul edilib. "Sosial sığorta haqqında" AR Qanununa edilən dəyişikliklərə əsasən məcburi dövlət sosial sığorta haqqının dərəcələri azaldılır.

Belə ki, 01.04.2020 tarixindən 01.01.2021 tarixinə kimi fərdi sahibkarların məcburi dövlət sosial sığorta haqqı aşağıdakı dərəcələrlə ödəniləcək:

1. Tikinti və ticarət sahələrində sahibkarlıq fəaliyyəti ilə məşğul olan fiziki şəxslər ölkə üzrə müəyyən olunmuş minimum aylıq əməkhaqqının (2019-cu il sentyabrın 1-dən 250 manat) 25 faizi - 62.50 manat məbləğinin:

• Bakı şəhərində 100 faizi - 62.50 manat,
• Sumqayıt və Gəncə şəhərlərində 90 faizi - 56.25 manat (250 * 25% * 90%),
• digər şəhərlərdə 80 faizi - 50 manat (250 * 25% * 80%),
• rayon inzibati ərazi vahidlərinin inzibati mərkəzi olan inzibati ərazi vahidlərində və qəsəbələrdə 60 faizi - 37.50 manat (250 * 25% * 60%),
• kənd yerlərində 50 faizi - 31.25 manat (250 * 25% * 50%) miqdarında məcburi dövlət sosial sığorta haqqı ödəyəcəklər.

2. digər sahələrdə sahibkarlıq fəaliyyəti ilə məşğul olan fiziki şəxslər isə ölkə üzrə müəyyən olunmuş minimum aylıq əməkhaqqının 15 faizi - 37.50 manat məbləğinin:

• Bakı şəhərində 100 faizi - 37.50 manat,
• Sumqayıt və Gəncə şəhərlərində 90 faizi - 33.75 manat (250 * 15% * 90%),
• digər şəhərlərdə 80 faizi - 30 manat (250 * 15% * 80%),
• rayon inzibati ərazi vahidlərinin inzibati mərkəzi olan inzibati ərazi vahidlərində və qəsəbələrdə 60 faizi - 22.50 manat (250 * 15% * 60%),
• kənd yerlərində 50 faizi - 18.75 manat (250 * 15% * 50%) miqdarında məcburi dövlət sosial sığorta haqqı ödəyəcəklər.

3. vəkillər kollegiyasının üzvləri, sərbəst auditorlar, sərbəst mühasiblər - vəkillər kollegiyasının üzvləri, sərbəst auditorlar, sərbəst mühasiblər - gəlirlərinin (xərclər çıxılmaqla) 10 faizi miqdarında;

4. Bundan başqa, Qanuna daxil edilmiş yeni maddələrə əsasən, sabit vergi ödəyən şəxslər, və ya fərdi qaydada (muzdlu işçi cəlb etmədən) aşağıdakı cədvəldə nəzərdə tutulan fəaliyyət növləri ilə məşğul olan fiziki şəxslər, və "Fərqlənmə nişanı" alan avtomobil nəqliyyatı vasitələri ilə sərnişin və yük daşımalarını həyata keçirən vergi ödəyiciləri aşağıdakı miqdarlarda məcburi dövlət sosial sığorta haqqı ödəyəcəklər:

Fəaliyyət növünün adı	Minimum aylıq əməkhaqqının
Toylarda, şənliklərdə və digər tədbirlərdə aparıcılıq, çalğıçılıq, rəqqaslıq, aşıqlıq, məzhəkəçilik və digər oxşar fəaliyyət	5% - 12.50 manat
Fərdi foto, audio-video xidmətləri (foto studiyalar istisna olmaqla) sahəsində fəaliyyət	5% - 12.50 manat
Çəkməçi, pinəçi	3% - 7.50 manat
Saat, televizor, soyuducu və digər məişət cihazlarının təmiri	3% - 7.50 manat
Fərdi yaşayış evlərində və mənzillərdə ev qulluqçusu, xəstələrə, qocalara və uşaqlara qulluq xidməti, dayə, fərdi sürücülük, ev təsərrüfatında təmizlik, bağban, aşbaz, gözətçi və iaşə obyektlərində müştərilərə xidmət göstərən fiziki şəxslər (ofisiant)	3% - 7.50 manat
Nəqqaşlıq emalatxanalarının fəaliyyəti	3% - 7.50 manat
Fərdi qaydada bərbər fəaliyyəti ilə məşğul olan şəxslər	3% - 7.50 manat
Fərdi qaydada dərzi fəaliyyəti ilə məşğul olan şəxslər	3% - 7.50 manat
mülkiyyətində olan kənd təsərrüfatına yararlı torpaqları istifadə edən fiziki şəxslərin (digər sahələrdə işləyib məcburi dövlət sosial sığorta haqqı ödəyənlər istisna olmaqla) və ailə kəndli təsərrüfatlarının əmək qabiliyyətli (I və II dərəcə əlilliyi olan şəxslər, həmçinin sağlamlıq imkanları məhdud 18 yaşınadək uşaqlar istisna olmaqla, 15 yaşından "Əmək pensiyaları haqqında" Azərbaycan Respublikası Qanununun 7-ci maddəsi ilə müəyyən edilmiş yaş həddinədək olan şəxslər) ailə üzvlərinin hər biri üçün məcburi dövlət sosial sığorta haqqı torpağın sahəsindən asılı olaraq, minimum aylıq əməkhaqqının aşağıda göstərilən dərəcələri üzrə hesablanır:	5 hektaradək olduqda - 2% (5 manat); 5 hektardan 10 hektaradək olduqda - 6% (15 manat); 10 hektardan yuxarı olduqda - 10% (25 manat);
AR Vergi Məcəlləsi ilə müəyyən olunmuş qaydada "Fərqlənmə nişanı" alan avtomobil nəqliyyatı vasitələri ilə sərnişin və yük daşımalarını həyata keçirən vergi ödəyiciləri	6% - 15 manat

Yuxarıdakı cədvəldə nəzərdə tutulan fəaliyyət növləri ilə məşğul olan fiziki şəxslər (mülkiyyətində olan kənd təsərrüfatına yararlı torpaqları istifadə edən fiziki şəxslər və ailə kəndli təsərrüfatlarının əmək qabiliyyətli ailə üzvləri istisna olmaqla) üçün aylıq sosial sığorta haqqının məbləği aşağıdakı əmsallar tətbiq edilməklə müəyyən olunur:

• Bakı şəhərində (kənd və qəsəbələr daxil olmaqla) – 2,0;
• Abşeron rayonunda, Sumqayıt və Gəncə şəhərlərində – 1,5;
• Digər şəhər və rayonlarda – 1;

Yuxarıdakı cədvəldə göstərilən fiziki şəxslər tərəfindən məcburi dövlət sosial sığorta haqqı "Sadələşdirilmiş vergi üzrə sabit məbləğin və məcburi dövlət sosial sığorta haqqının ödənilməsi haqqında qəbz" alınarkən, "Fərqlənmə nişanı" alan avtomobil nəqliyyatı vasitələri ilə sərnişin və yük daşımalarını həyata keçirən vergi ödəyiciləri tərəfindən "Fərqlənmə nişanı" alınarkən ödənilir.

Mənbə: